Interi ka regjistruar fitoren e shtatë radhazi në Serie A pasditen e sotme (e shtunë).

“Nerazurrët” kanë mposhtur me rezultat tronditës 5 me 0 skuadrën e Genoas në ndeshjen e zhvilluar si nikoqir në Giuseppe Meazza në kuadër të xhiros së njëmbëdhjetë në Serie A, shkruan portali arbresh.info.

Me dy gola të shpejta, asistues i të cilëve ishte Joao Mariao, skuadra e Luciano Spalletit kaloi në avantazh pas vetëm një çerek ore lojë. Roberto Gagliardini realizoi golin e epërsisë, ndërsa Matteo Politano dyfishoi shifrat.

Autori i golit epërsisë gjeti sërish portën në pjesën e dytë duke shënuar për 3 me 0 vetëm katër minuta pas pushimeve.

Dy golat e tjerë nga nikoqirët u realizuan gjatë minutave shtesë. Jao Mario gjeti përfundimisht rrjetën duke realizuar për 4 me 0 (91′) para se të asistonte sërish më pas te Radja Nainggolan që shënoi me kokë për 5 me 0 (94′).

Interi tani ka 25 pikë dhe qëndron në pozitën e dytë në tabelë me tri pikë më pak se Juventusi si lider i tabelës, ndërsa me pikë të njëjta si Napoli në pozitën e tretë.

Genoa vazhdon qëndrimin në pozitën e 11-të me vetëm 14 pikë të mbledhura deri tani./arbresh.info/

Shikoni të gjitha golat: